PATIK NI DEBATA

PATIK NI DEBATA

Patik Parjolo
Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.

Dia do lapatan ni i?
On do: Ingkon umbiar rohanta jala humolong jala umpos mida Debata asa mida nasa na adong.

Patik Paduahon
Ndang jadi ganaonmu jala ndang jadi sumanonmu manang aha na di banuaginjang dohot na di banuatonga on ro di na di bagasan aek na di toru ni tano, ianggo tung gabe sisombaon manang siolon.

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa ndang jadi iba marsomba tu sombaon manang tu ganaganaan, mangido hangoluan sian i, jala ndang jadi oloan begu manang ulpahan ni hadatuon, jala ndang jadi pos roha di ugasan hahomitan.

Patik Patoluhon
Ndang jadi dohonon goar ni Debata, ianggo so ture dalanna. Ai hona uhumNa do sogot angka na marsineang di goarNa.

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolonnolon manang marujarujaran na roa, manang manmgansi marhite goar ni Debata; ai di na tarsosak dohot tangiang dohot pujipujian do sidohonon goar ni Debata.

Patik Paopathon
Ingot hamu ma pabadiahon ari minggu i! Di na onom ari ma ula hamu nasa siulaonmu, alai anggo ari papituhon i, ari paradianan ni Jahowa Debatam do i. Ndang jadi ho mangula anggo di sadari i, manang anakmu pe manang borum, manang naposom lahilahi, manang naposom boruboru, ro di pinahanmu ro di pangisi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina; dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradianan i jala diparbadiai.

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang tois rohanta di ajar na sian Hata ni Debata, ingkon badia do Hata ni Debata di rohanta jala ingkon ringgas rohanta tumangihon dohot mangguruhon.

 

Patik Palimahon

Ingkon pasangaphonmu do natorasmu asa martua ho, jala leleng mangolu di tano na nilehon ni Jahowa Debatam di ho.

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang lea rohanta mida natorasta dohot mida angka rajanta ro di angka natuatua. Ndang jadi paroonta rimas nasida, ingkon pantun do hita jala ingkon holong rohanta tu nasida, sioloan do nasida jala sisubuton do rohana.

Patik Paonomhon
Unang ho mamunu

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang hita olo mambahen sahitsahit tu nasa na mangolu, ingkon roha pangoluhon do rohanta di nasa na mamngolu.

Patik Papituhon
Unang ho mangalangkup

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa toman rohanta jala porman dohot pangalahonta ro di hatanta, ianggo angka naung marbagas i ingkon masiparhamaolan jala masihaholongan.

Patik Paualuhon
Unang ho manangko

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang hita olo mandobo hepeng di dongan jolma manang mambahen bisukbisuk mangalansumhon boniaga, ingkon sipagandaon ni rohanta arta ni dongan jala siramothononhon.

Patik Pasiahon
Unang ho olo manghatindanghon hata na so tutu maralohon dongan jolma.

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang hita olo manggapgapi dongan jolma manang manjehehon manang pahatahatahon, paoruhon sangapnasida, ingkon niampinan do dongan jolma anggo so tangkas dope diboto salana. Holan uhum na denggan i do paboaboaon.

 

Patik Pasampuluhon

Ndang jadi haliangan ni rohan bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru, manang lombuna manang hodana, manang dia pe ugasan ni donganmu.

Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa unang hita olo marangkal mangarohai ugasan ni dongan jolma dohot ugasan tinadinghon ni ompuna, siurupan do nasida mangaramoti asa ugasanna. Angkup ni i ndang jadi bolabolaonta pardihuta ni dongan jolma manang naposona pe, siapoan do nasida jala sidasdason mandapothon ulaonna hian.

Beha do pandok ni Debata taringot tu Patik nasampulu i?
On do: Ahu do jahowa Debatam, ninna Debatanta, pargogo na so hatudosan jala parrimas, sai luluhononku do dosa ni amaama tu pinomparna ro disundut patoluhon, ro di sundut paopathon, pinompar ni angka na sogo roha di ahu, alai asi do rohangKu di angka na marriburibu angka na marholong ni roha di Ahu, na so mangalaosi 

Beha do pandok ni Debata taringot tu patik nasampulu i?

On do: ahu do jahowa Debatam, ninna Debatanta, pargogo na so hatudosan jala parrimas, sai luluhononku do dosa ni amaama tu pinomparna ro disundut patoluhon, ro di sundut paopathon, pinompar ni angka na sogo roha di ahu, alai asi do rohangku di angka na marriburibu angka na marholong ni roha di ahu, na so mangalaosi patikHI.

 dia do lapatan ni i?

On do: dipalumba Debata do hita disi, didok do pinsangonna nasa namangalaosi patikna i. Dibahen i tama do dihabiari rohanta rimasna, unang ma nilaosan patikna. Alai diparbagabaga do asi ni rohana, angkup ni i nasa na denggan di angka na so mangalaosi patikna. Dibahen i tama haholongan ni rohanta dohot haposan ni rohanta ibana, jala las rohanta mangoloi patikna.

 

RENUNGAN HARIAN

Renungan Harian; Jumat, 12 Maret 2021

Psalmen 32:2 "Martua ma jolma, ia so * dijujur Jahowa tu ibana hajahaton, jala ndang * marpangalensem tondina di bagasan".  

Mazmur 32 ; 2 :"Berbahagialah manusia, yang kesalahannya tidak diperhitungkan TUHAN, dan yang tidak berjiwa penipu!"

Psalmen  32 on Pabotohon/paingothon tu hita asa ta tanda hadirionta diangka pambahenanta na so dihalomon Debata di pardalanan ningolunta. Parpsalmen (Raja Daud) berusaha do ibana naeng martabuni sian Debata diangka pangalosionna,  di pikir rohana sude na diulahon ni ibana angka dosa dingoluna dang diboto Debata. jala berusaha do ibana manabunihon saluhutnai sian jolo ni Debata, hape nagabe manghorhon hasusan di ibana sandiri, gabe merasa salah sandiri do ibana. Songon natarsurat di Psalmen 32; 3-4 ( ayat 3 : Ai saleleng huhasiphon dosangku reung do holiholingku, dibahen anggukku ganup ari.:ayat 4 Ai sai didondoni tanganmu do ahu arian dohot borngin, jadi marsik do mudarhu songon di hamamasa ni logo ni ari. Sela.) alai didok di (ayat 5 : Jadi hupabotohon ma tu Ho dosangku jala ndang huhungkupi salangku; ningku do: Topotanku ma angka pangalaosingku tu Jahowa, jadi marpamuati do roham di utang ni dosangki.) ditopoti ibana saluhutna angka dosana tu adopan ni Debata, jala mangido ibana hasesaan ni dosana tu Debata. Debata  pardenggan basado lala Parasiroha na sumurung, marhite panopotionna di dosana, disesado dosana saluhtna, jala songon pengakuan raja Daudi gabe sonang ma rohana, marlas niroha ibana dingoluna.

Diondolhon hata ni Debata tu hita; Jolma nasai tontong mangulahon dosa jala merasa dirina sude na niulana dang diboto Debata,  jala ido na mangkorhon hasusaan dingoluna, Serba salah, jala dang dapot hadameon dingoluna. Alai naeng ma songon raja Daudti hita, manopoti sude dosana tu Debata. Gabe marlasniroha hita dinamandalani pargoluonta siganup ari. hata ni Debata di 1 Johannes 1 : 9 ("Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon"). Antong Tapadaoma dirinta sian angka Dosa, jala Tatopotima sude tujolo ni Debata angka dosanta. Jala taingotma Hata ni Jahowa" Songon sintongna mangolu ahu, ninna Tuhan Jahowa, tung na so lomo do rohangKu mida Hamatean ni Parjahat i, na lomo do rohangKu mida hamumulakni parjahatti, tumadingkon dalanna, asa mangolu ibana" (Hesekiel 33; 11). Amen