MANANGIANGKON BONI

Manangiangkon Boni. Minggu 20 Oktober 2024.

Huria na hinaholongan di bagasan Jesus Kristus. Di minggunta sadarion,  patupaonta do lao manangiangkon boni. Paingothon hita do ulaon on, paboa ndada ala ni gogonta umbahen na manjadi saluhut na taula, alai na ro ma hita tuadopan ni Debata pasahathon nasa hadirionta di na laho mangula ulaonta i. Na ro ma hita tu adopan ni Debata asa Ibana na mandongani, mangurupi,manumpahi di nasa ulaonta i, jala mamasumasu boni na laho sisuaononta tu ganup hauma manang ladangta be. Antong,  Tapuji ma tuhannta Marende hita sian BE. No. 309: 1 – 2 a

Marende BE. No. 309: 1 – 2 “Raphon Tuhan Jesus 
1. Raphon Tuhan Jesus i pungka ulaonmu, ingkon tu Ibana i  parguruhononmu, Baen Ibana donganmi hehe dohot modom.  Dege ma bogasNa i rohami pahohom.

2.  Ganup sogot ingkon do Jesus jouhononmu,

 Asa urupanNa ho di siulaonmu. 

Ai arian borngin pe naeng ho dongananNa. Dosami pe sasude NaengtaluhononNa.

2.   Hata ni Debata, pasikkophon dohot padasiphon, huhut patoguhon rohahanta laho manabur boni sisuanonta di hauma manang di porlakta be,  ima natarsurat di  1 Musa 8:22 songonon ma hata disi: "Onpe, saleleng adong tano on, ndang jadi mansohot saburon dohot  gotilon,  ari ngali  dohot ari las, ari logo dohot rondo ni ari, arian dohot borngin" 
Martangiang ma hita: Ale Tuhan Debata Amanami na di banua ginjang.  Ho do nampuna langit dohot tano on ro di pangisina sudena. Jadi-jadian nitanganMu do sude nasa adong, jala na pinarmuduM do hami na tinompaMon . Namarpungu do hami nuaeng martangiang tu HO,  laho  pasahathon pangidoan nami tu Ho. Huhaporseai hami do, Ho do Debata mula ninasa na adong, Ho do sitompa nasa nadong jala namamasumasu ngolunami, jala mambaen manjadi sude nasa naniula nami. Nuaeng huboan hami do bonion tu joloM, asa jumolo pasu-pasuonMu andorang so husuan hami. Asi ma roham ale Debata, sai ramoti ma na huula hami, asa dao sian angka bala, ro di manang aha pe tahe na tau manegai nahuula hami.Lehon ma udan dohot las ni ari ditingki halehetanna asa tung mansai denggantano hatubuan ni suansuanan nami, natau gabe hangoluan nami. Sai Lam patandahon ma tu hami godang ni denggan ni basaM, asa huboto hami mandok mauliate tu Ho dohot mamuji goarmu na badiai. Sai tangihon jala oloi ma pangidoannami on, marhitehite Tuhan Jesus Kristus Tuhan nami,Amen.